PLASTIKAN HAINBAT LAN BILTZEN

 

Bigarren ebaluazioa amaitzen ari gara. Hainbat lan egin ditugu eta inauteriak igarota azken lanak biltzen hasi gara. Hemen dituzue lagin batzuk eta denak amaitutakoan google/argazkiak karpeta batean jasoko ditugu. Goiko hau Saturnoren koadroa da Rubensek egindakoa, Pradoko museoan dago gaur egun. Ariketa, arte lana aukeratu eta gif animatua sortu. Alana M.-k egin du.

M8 egunaren harira 1911 inguruko mexikar iraultza zapatista hartu dugu gaia eta Adelitak deituriko emakume gerrilariak marraztu ditugu inolako irudirik ikusi gabe, ez mugikorrik ez ordenagailurik ez dugu erabili, buruz egin ditugu marrazkiak. Bata Maren U.-rena da eta bestea Anna W.-rena.

M8 egunaren harira ere proportzioa eta testura landu ditugu Greta Garbo aktorearen argazkiaren erreprodukzioa handituta.

Animazioak eskuz marraztuta ere egin ditugu, geihenak Gimp software librea erabilita eta beste batzuetan mugikorreko hainbat aplikazio erabilita. Animazio hau Alaitz V.-rena da.

Errotua ere erabili dugu, tinta txinarrarekin batera, hainbat emaitza bilatzeko asmoarekin. Goiko hau June M.-rena da.

Munduan zehar digitalki bidaiatu eta hainbat hiri bisitatu ditugu...Londresen Nahia M. ikaslea egon da.

Inauteriak garaian hainbat lan egin ditugu, hala nola, kartel digitalak, objetuak, marrazkiak...

Dead Pool gaiarena Lore E.-rena da.

INAUTERIAK PLASTIKAN: OBJEKTUAK ESPAZIOAN KOKATU.

 

Plastikan inauteriak girotzeko proiektuak egiten ditugu. Oraingo honetan talde lanari garrantzia eman eta objektu handiak sortu ditugu espazioan eragiteko, hain zuzen, korridorean hautatutako espazioan. Lau proiektu gauzatu dira 4. mailan: Titanic itsasontzia, mexikar txapela, Spiderman eta Lady Bug. Argazkiak ikusteko klikatu argazki handia.

Proiektuetako bat hautatu eta antzerki xume bat egin dugu 3. mailako talde batekin.

IKONIZITATEA INAUTERIETAN: HIZKUNTZA PLASTIKOA

 Inauteriak aitzaki pertsonaiak irudikatzen ari gara mozorrotzeko ideiak izateko. Marrazkiak egiten. Irudiak. Helburua korridoreak inauterietarako girotzea eta ikusleak irudikatzeko modu berriak jasotzea da. Abstrakziora hurbilduz pertsonaiak irudikatu ditugu. Pertsonaiak ezagutzeko bere forma , koloreak eta ezaugarri nagusiak izan ditugu kontuan. Irudi guztiak ikusteko klikatu ondoko irudian. Ea asmatzen duzun zein den bakoitza...

SOFTBODY. FISIKAK 3D EREMUAN: MALGUTASUNA

#blender software librea erabiliko dugu Plastikan animazioak egiteko 3D eremuan, eta kasu honetan simulazio fisikoak sortzeko. Oraingoan malgutasuna. Lehenik eta behin pilotaren ibilbidea gauzatzeko egitura sortuko dugu. Kuboak dira maldak sortzeko ertzak editatuta. Collision agindua dute. Pilota oraingoan ez da Rigidbody izango, softbody baizik. Malgutasuna izango du, hau da, talkaren ondorioz forma aldakorra izango du etengabe. Horretarako, parametroak definituko ditugu: airezko pilota den ala ez, zenbat presio duen, azalaren gogortasuna, boteak emateko ahalmena, hauskortasuna, grabitatearen indarra, haizearen indarra...aukera ugari izango ditugu. Hemen adibide xume bat duzue...

Blender 3.2 aurki dator eta garapena etengabea da 3D software honetan. Eskultura eremua asko garatu da. Bertan, oihalak lantzeko eta animatzeko aukera eta erreminta ugari sortu dituzte azkenaldian. Galiziako #PabloDobarro aritu da burubelarri horretan. Orain bere proiektuetan dabil eta ez dago Blenderren lanean. Oihalaren teknikak jarraituz dago eginda pilotaren animazioa, Jayanam bideoan ikusita, youtuben. Blender garatzeko eta laguntzeko komunitate handi bat dugu. Bideo hau egiteko laguntza gisa kanal hau izan dut kontuan youtube JAYANAM. #jayanam @jayanam

3D EREMUAN FISIKAK.

3D eremuan, eta Blender software librea erabilita, gauza ugari egin daitezke: 2D eta 3D diseinua, arkitektura, ingeniaritza, simulazio animatuak, VFX efektu bereziak, marrazki bizidunak, animazioak, eta abar bukaezina...eta baita ere SIMULAZIO FISIKOAK.

Eszenako elementuen parametro fisikoak aldatu ahal

 izango ditugu: grabitatearen eragina, haizea,

objektuen masa, talkak, malgutasuna eta 

marruskadura indarra definituko ditugu, besteak beste.

Arloko hainbat gaietan garatu dezakegu fisika

 3D eremuan; batetik, geometrian bistak, diedrikoa

zein isometrikoa lantzeko; bestetik, fisikan 

oinarritutako animazioak zein efektu bereziak lantzeko

balioko liguke; azkenik, bideo-jokoetan txertatu ditzakegu ere.

Gurean, Plastikan, programazioan landutako

 proiektuetan erabilikodugu 3D eta 2D animazioa

horrela erabakitakoan, bideo edizio, irudigintza

 digitala erabili ohi ditugun moduan. Hauspoan 3D

ANIMAZIOA tailerra dugu jada abian eta

 fisikak erabilitako horrelako animazioak ere egingo

ditugu. Behin prozedurak bereganatuta sormenerako

 bide ugari irekitzen ditu.

2D IRUDI BATEKIN 3D ESPAZIOA / BOLUMENA SENTSAZIOA LORTU.

 

XV.-XVI. mendeetako Errenazimentu garaian Koperniko eta Galileo nabarmendu ziren Eguzki-sistemaren inguruko arrazoiketa eta ikerketengatik. Inkisizioari ez zitzaion hori gustatu eta lehenengoaren lan zientifikoa debekatuta eta ezkutuan izan zuten 200 urtez eta bigarrena bere aurkikuntzak egia ez zirela aitortzera behartu zuten. Interesgarria zientzia eta erlijioaren arteko talka; sarritan gertatua, ikerketa-zientzia eta boterearen interesen bidegurutzea.

Pentsamenduaren eta jarreraren aldaketa garaiak izan ziren mende hauek. Gizakia eta zientzia guztiaren oinarri.

Artea ulertzeko eta arteak gizartean eragiteko duen funtzioa ulertzeko Berpizkundera hurbilduko gara. 2Dko irudi bat hautatuko dugu. #Gimp irudi editorearekin hautatutako irudia 3 iruditan zatituko dugu.

Ondoren #Openshot bideo editorean zoom hurbilketak egingo ditugu. Hau egiteko zati bakoitzaren eskala handituko dugu. Bai Gimp eta bai Openshot software librea dira, Ubuntu Linux sistema eragilea bezala.

LAUAIZETATIK TOK BIDEOAK EUSKARAZ

 Gaur abenduaren 3an ospatzen da euskararen eguna mundu mailan. Lauaizetatik TOK bideo lehiaketa antolatu da Lauaizeta ikastetxean eta Plastikatik esku bat bota dugu publizitatean eta bideoak sortzen ere. Bideoak gelaka sortu ditugu eta ondo pasatzeaz gain saria da gure helburua: hamaiketakoa taldearentzat! Lauaizetako blogean klikatuta ikusi ahalko dira aurkeztutako lan guztiak. 

Gure euskarari laguntzeko modurik onena eta erangikorrena erabiltzean datza. Hitz egitea, entzutea, ikustea, idaztea eta irakurtzea. 2021ean ere IKTak erabil ditzakegu euskaraz. Webguneak, blogak, serieak, filmeak, sare sozialak edo arte digitala euskaraz egiteko eta erabiltzeko hautua egingo dugu ere. Eta tiktok antzeko bideoak egingo ditugu euskaraz, eta 3D eta abar, egunerokoa. Abestiak dion bezala, zergatik ez. Nahi dugulako eta ondo pasatzen dugulako.

Plastikan sortutako bideoak hemen ere argitaratuko dira, bietan.

PALEOLITOA PLASTIKAN. LABAR-ARTEA.

 

Labar artea landu dute Paleolito gaian gizarte arloan eta Plastikan egin ditugu GIF animazioak.

 Urtero egiten ditugu arloen arteko proiektuak zeharkatu.  

Urte batean, Paleolito gaia landu zuten Gizarte arloan 

eta elkarlanean kobazuloa bihurtu genuen korridorea eta aitzina garaiko uneak berreskuratu

 genituen. 

Animazio batzuk ikusgai dituzue hemen, Paleolitoko labar artekoak eta beste batzuk

 librekoak.

SCI FI 3D ESZENAK. ZIENTZIA FIKZIOA : SORMEN IREKIA.

 

Plastika eta ikusizkoen hezkuntzan sormena , konposizioa, kolorea, testura eta argiztapena garatzeko gai aproposa da #zientzia fikzioa. #Kubriken 2001 Odisea, #Fritz Langen Metropolis, #Alien, #Matrix, #Blade Runner, #Dune...Psikologia, filosofia, gizartearen inguruko gai guztiak jorratu izan dituzte zinemagintzak eta literaturak. Hemen, 3D eremuan, eszenak sortzen hasi gara...

Gaur da eguna 3D landu dezakegula plastika arloan ordenagailuen potentzia eta grafikak beste mundukoak izan gabe. Errealismo naturala sortzeko eszenetan eskuragarri dugu software librea. Oso ona da software multzo hau eta filosofia paregabea du: edonork erabil dezake libre eta edonork lagun dezake hobetzen eta garatzen.

3D lantzeko Blender erabiliko dugu eta goiko eszena egiteko ez da denbora askorik behar. Behe laino modukoa kubo bat da eta honi gardentasun moduko bat ezartzen zaio. Horrela girotzen da eszena. Eszena osatzen duten azalera guztiek patroi berdina dute: metal izaerako azala eta testura emateko maskara (zuri eta beltza den karratu eta lauki luzeak). Maskara honek erliebe pixkat du ezarrita. Azkenik, eta nabea animatu aurretik, argi txikiak gehituko ditugu eszenan, ezkerretik urdina (hotza) eta eskuinetik horia (beroa).

3D ESZENA HIPERREALISTAK. Zeruak NISHITA addona erabilita.

Addonak programa bati hau hobetzeko eransten zaizkion programa txikiak dira. 3D mundua iraultzen ari den Blender software librearen kasuan etengabeko garapena ari da gertatzen. Mundu osoko komunitateak ekarpenak egiten ari zaizkio Blender progamari eta hau etengabe eguneratzen ari da. Abenduan aterako dute #Blender 3.0 bertsioa.

Blender ireki eta zerua jartzeko nahikoa da NISHITA SKY TEXTURE jartzea. Parametroak animatu, eguzkiaren altuera adibidez, eta egunsentiaren animazioa egin dezakezu. Kaskahezurra egiteko denborarik ez? deskargatu internetetik FREE bada eta egilearen izena jarri kredituetan #Suresh-sureshundaram (https://www.cgtrader.com). Musika konposatzeko denborarik ez, berdin, deskargatu librea bada eta egilea aipatu #Onurvari (https://soundcloud.com). Aipatu behar ere komunitateak eskaintzen dituen bideotutorialak hortik zehar. Kasu honetarako laguntza berezia jaso dut kanal hauek ikusita: #cinematix https://www.youtube.com/channel/UCpuKDBw8IVIdKWPhiB2VDNQ eta #emeuve https://www.youtube.com/c/EmeUve.

Duela urte gutxi pentsa ezinezkoa zena gertatzen ari da 3D munduan. Ikastetxeko ordenagailuetan 3D eszena hiperrealistak sortuko ditugu. Zer da 3D eszena hiperrealista? argiztapena naturala gertatzen denean. Argiak itzalak sortzen ditu eta objektuek beraien arteko harremanetan hainbat itzal ñabardura sortuko dituzte: objektua urdina bada, ondoko objektuan joko duen isladak urdinduko du itzal hori. 

Sortuko dira eszena hiperrealistan materialen testurak, isladak, gardentasunak eta gardentasun zein azalera zikinak (hatz markak, pitzadurak, kolpe markak, hezetasunaren markak eta abar luzea).

Eszena hiperrealistan argazkigintzan eta zineman erabiltzen den eremu sakonera erabiliko dugu, eremu batzuk desenfokatuz eta, nahi izanez gero, "aberrazio kromatikoa" erabiliko dugu.

Airearen hauts kantitatea kalkulatu eta jarriko dugu; eta, goian aipatu bezala, Nishita addonaren abantailaz balia gaitezke: batetik, eguzkiaren indarra zein tamaina definituko ditugu (zenbat eta argi iturria handiagoa orduan eta itzalaren ertzak suabeagoak izango dira), bestetik, eguzkiaren altitudea eta latitudea, eta, azkenik, eguzkiaren argiaren kolorea definitu genezake. 

Irudimena erabili eta pentsatu duzun hori, lasai, egin daiteke. 

Parametro guztiak animatu daitezke.

Deskargatu eta erabili software librea! https://www.blender.org/download/

ARTE GARAIKIDEAREN ANALISIA. IRUDIAK IKUSI.

 Irudiak ikusi, aurrekariak ezagutu eta bakoitzak egin beharko du 2 edo 3 esaldiko hausnarketa.

KASIMIR MALEVITX. 1915. UKRAINA.

Arte lana "Karratu beltza fondo zuriaren gainean".

Abstraktua da. Europan arte abangoardiak pentsamolde aldaketak plazaratzen hasiak ziren.. Errusiar inperioaren amaierarekin bat sortu ziren ere arte abangoardia gehiago. Aurreko gizartearekiko kulturarekin hautsi nahian, kultura berri baten bultzatzaile. Garai hoiek arte, arte pinturak erosi eta dastatzen zituzten pertsonak dirudunak eta boteretsuak ziren: agintari, noble eta elizako boteredunak. Herritarrek, ikustekotan, elizetan ikusten zituzten pintura erlijiosoak. Errusiar iraultza gertatu zenean, hainbat arte korronteek proposatzen zuten gizartearen kultura aldaketa, herritar guztien eskubideen berdintasuna, askatasun kulturala, soziala eta boterearen egituraketa justuagoa eta demokratikoagoa.

CHEMA MADOZ. MADRILEKOA.

Arte lana "Eskailera eta ispilua".

Surrealista da. Argazkiak egiten ditu sortzaile honek. Hizkuntza poetikotik oso hurbil dagoen argazkilaria da. Objektuak eta ideia erabilita kontzeptuak garatzen ditu. Eskultura eta argazkigintza uztartu eta arte lanean bihurtzen ditu argazkigintzaz baliatuta.

BODEGOIA PLASTIKAN. BAI ALA EZ?

Plastikako ariketak proposatzerakoan zalantzak izaten ditugu prozedurak eta ibilbideak zehazterakoan. Edozein marrazki egitea beti izan daiteke aberatsa. Irakurtzea ere. Edo korrika egitea. 

Bodegoia pintatzeko ariketa planteatzeak merezi al du?

Bodegoia egiterakoan behaketa lantzen da, analisia. Objektuen formak eta elkarren arteko harremana konposizioan. Objektuen testura eta koloreak landu daitezke. Argiak, itzalak eta distirak. Objektuan ondoko objektuaren koloreak izan dezakeen eragina ikus genezake.

Baina merezi al du ariketa horretarako planteatzea? Ezin al dira landu kontzeptu eta prozedura hauek beste moduko proiektuetan?

PLASTIKA 21-22 IKASTURTEA HASTERA DOA!

21/22 ikasturtea hastera doa. Elkar egingo dugun bidai honetan denok ondo pasatzea da helburu nagusia: esperientziak partekatu, euskaraz bizi eta gozatu, elkarrekin denok ikasi, eta software librearen filosofia aberatsa erabilita, gainera. 

3D IRUDI ETA ESZENA ERREALISTAK

Plastika eta Ikusizkoen hezkuntzan une oro ari gara gauzak sortzen. Hainbat hizkuntza plastiko erabiltzen ditugu. Proiektura ondoen egokituko dena, ahal bada. Irudiak eta objektuak sortzeko, edozein eszena sortzeko, 3D mundua eskura daukagu software libreari esker.

 

Linux sistema eragilearekin erraz dabilena, eta plataforma anitzekoa denez, beste sistemetan ere ondo dabil. #BLENDER software librea da programa. Horregatik ez dugu chromebooken beharrik; aldiz, linux dabilen ordenagailuak behar ditugu, produkziorako software librea erabiltzeko: #GIMP, #INKSCAPE, #BLENDER, #OPENSHOT, #LIBREOFFICE etabar luzea.

Kasu honetan, eskuko lanpara egin dugu. Erreferentziako irudia interneten hautatu dugu eta 2 aukera izan ditugu. Koloretako arkatzez marraztu ala 3D eremuan sortu. 

3D eremuan egin dugunean honako pausuak eman ditugu: objektua egin, lurra egin, testurak jarri, kristala sortu, kristala zikindu eta zahar itxura eman, armiarma sareak jarri, kristala zulatu, kandela sortu, argia lanpara barruan jarri, eszena iluna sortu, lainoaren bolumen argia sortu, argia animatu, kamera animatu eta bideoa grabatu.

IKASLE OHIEN BISITA DIDAKTIKOA: ZINEMA, ARGAZKIGINTZA ETA MODA DISEINUA.

 

Programatuta genuen bezala etorri ziren Lauaizetara gure ikasleak izandako Ainhoa Gutierrez, June Alduntzin (@xurne.s /instagram) eta Irati Albizu (@iratiroal /instagram). Esperientzi aberasgarria, bisita soilik ona izanik ere, beraien ibilbide sortzailea azaldu ziguten, buruan dituzten proiektuak; eta, pasatako ikasketa eta esperientziak ere partekatu zituzten gurekin. ARGAZKIAK IKUSTEKO KLIKATU.

Ainhoak egindako zinema proiektuak erakutsi zizkigun eta bertan dauden zinema-hizkuntzaren nondik norakoak azaldu zizkigun. Saiatu ginen gainera ikasleek, 4dbhko plastikako ikasleek, zinemaren komunikazio erreminta horiek uler zitzaten. 

June etorri baino aste batzuk lehenago argazkigintzaren inguruko ariketak egin genituen: argazkiak atera, argazkiak analizatu, argia, espazioa, adierazpena...Ondoren, instagrameko Juneren argazki artistikoak aukeratu eta tinta txinoarekin marraztu genituen, argazkiaren sekretuak aurkitzeko. June bisitan etorri zenerako ezagutzen genuen bere lana zertxobait. Junek azaldu zituen bere esperientzia eta argazkiarekiko bere planteamendua eta helburuak. Solasaldiaren ondoren Junek gidatutako argazkiak atera genituen ikastetxean zehar.

Irati etorri zitzaigun bere moda diseinuko hainbat arroparekin, beraien arteko ezberdintasunak eta ñabardurak argitzeko; modaren diseinuan garrantzitsuak diren gakoak argitzeko; josketaren zailtasunak ulertzeko. Aurretik, ikasleek arte klasikoko eskulturan eta pinturan ikusitako arropak erreproduzitu zituzten tintarekin; eta koloretan, gaur egungo arropak marraztu zituzten, mugikorretik hautatutako irudietatik. Bere proiektuaren landutako marrazki eta artxibategi moduko bat ere erakutsi zigun. Eta gainera, aurkezpen digitala prestatu zigun ere moda diseinuaren azpiegiturak eta ildo nagusiak erakusteko. Iratiren kasuan, azaldu zigun moduan, moda diseinuan ideiak landu eta estiloa jorratzen duzun heinean, enpresari/autonomo moduan jardun behar duzu; eta,  ondorioz, ekonomiak zein merkatuak asko mugatzen dute egiten duzuna.

Lauaizetako ikasleak Lauaizetan bukatu eta bisitan etortzea esperientzi aberasgarria da denontzat. Oso ondo pasa dugu. Ea hurrengo urteetan ere jarraitzen dugun antzekoak egiten. Milesker Ainhoa, June eta Irati.

AUZOEKIN ELKARLANEAN. LETAMAN GAZTETXEAK 25 URTE.

 

Intxaurrondoko auzoan Letaman gaztetxeak 25 urte bete ditu auzo eta Donostialdeko gizartea aberasten, espazio libre, partekatu, asanbleario eta autogestionatua aurrera eramaten. Ez gara hemen hasiko zerrendatzen  zein baliotsua den gaztetxeek egiten duten lana Euskal Herrian zehar. Dagoeneko denok badakigu.

Letaman gaztetxeko kide eta ikasle ohi batzuk etorri zitzaizkigun bisitan Lauaizetara eta 25. urteurrena zela eta, eskatu ziguten ospakizunetarako kartel/logoa egiteko ikasleekin plastikan. 

Lehenik eta behin gaiaren inguruko hausnarketa eta hurbilketa teorikoa egin dugu: gaztetxea. Ondoren, konposizioaren lanketa egin dugu eremu beltz eta zuriaren arteko erlazioan ideiak bilatzen. Zuri beltzean egin behar genuen.  Ideiaren sintetizazioa eta transmisioa bilatu nahian #inkscape software libreko irudi editore bektorialean aritu gara konposizioa borobiltzeko. Gehitu ditugun tipografiak dafont.com webgunetik aukeratu eta deskargatu ditugu.

Horretan ibili gara eta hemen dituzue proposamenak. Ea Letamanen baten bat aukeratzen duten. KLIKATU goiko irudian proposamen guztiak ikusteko. 

Letaman ikusiko garelakoan, jarraitu aurrera beste 25 urte gutxienez!

ALGARAKLOWN. PAILAZOAK OSPITALETAN IRRIAK ZABALTZEN.

 

Algaraklown pailazo elkarte bat da, musu truke ospitaletako gaixorik dauden umeak alaitzen jarduten duena. Lauaizetan planteatu zuten elkarlanean aritzea, maiatzaren 13an ospitaletako ume gaixoen eguna denez, tiktok bideoak egitea ikasleekin beraiek bideoak ospitalean erakutsi eta erabiltzeko. Bi motatakoak egin ditugu: irriak sortzeko barregurazkoak eta irriak sortzeko dantzak imitatzekoak. Tiktokak ikusteko klikatu argazkian.

21/22 PLASTIKA HAUTAZKOA 4 DBH.

 

KLIKATU IRUDIAN HAUTAZKOAREN AURKEZPENA IKUSTEKO.

Hurrengo urteari begira 3dbhkoek hautazkoak aukeratu behar dituzte. Plastika mintegitik 4dbhn PLASTIKA hautazkoa eskaintzen da. Kurrikulum-proiektua kontuan izanda, proiektuak garatzen aritzen gara, hainbat teknika erabilita ikasgelan, korridorean, kalean eta beste hainbat espazioetan: banaka-taldeka, IKTak erabiliz, aniztasuna kontuan izanik, euskaraz eta software librea bultzatuz; eta Plastika eta Ikusizkoen Hezkuntzan murgilduta. Hala nola, marrazkia, komikia, argazkigintza, zinema, diseinu grafikoa, animazioak, 3D diseinu eta animazioa, Arte garaikidea, Artearen historia eta abar.

MARRAZKETA ARTISTIKO DIGITALA.

Marrazketa artistikoa egiteko modu digitala (bideoa ikusteko klikatu hemen) erabiliko dugu. Kontzeptuak bereganatzeko ingurua eta bertako objektuak behatuko ditugu. Argiaren kalitatea analizatuko dugu, haren indarra, izan ditzaken kolore aukerak, eta azkenik, argi hori nondik datorren. Marraztuko dugun objektuaren egitura ikertuko dugu: geometria eta konposizioa, egituraren zati garrantzitsuenak eta bigarren mailako elementuak.

Arkatzarekin eta tintarekin objektua ulertu dugunean argazkiak aterako dizkiogu mugikorrarekin. Mugikorraren bideoa erabilita objektuaren 360 graduko ikerketa garatuko dugu. Arkatzarekin eta mugikorrarekin objektuaren bistak irudikatuko ditugu: aurreko bista, profila eta goiko bista. Arkatza eta erregelekin #isometriko sistema erabili eta objektuaren bolumenaren irudia marraztuko dugu. Argia eta bolumenaren trataera arkatzarekin ere marraztuko dugu isomterikoaren gainetik. Emaitza guztiak argazkietan dokumentatuko ditugu. Objektuaren analisi formala garatuta dugunean gauzatzeari ekingo diogu baina eremu digitalean. Horretarako, plastikako blog honetan ezaguna den BLENDER software librea erabiliko dugu. Merkatuko onena da eta librea denez edonork edonon erabil dezake. Librea eta komunitateak sostengatua. Filosofia ezin hobea dauka. Linux sistema eragilean eta besteetan instala dezakezue 5 minututan. https://www.blender.org/ Software hau ikaragarri aurreratzen ari da eta azken bertsioa, 3.0, oso ona da, indartsua eta grafika arruntekin ere ondo dabil. 3D eta bideo eremuan ordenagailuaren grafika eta prozesadoreak badu garrantzia, noski. Baina software hau erabil daiteke ordenagailu arruntetan modu optimizatuan eta emaitza onak lortzeko.

Geometria orokorretik hasiko gara, zilindrotik kasu honetan, eta hau eraldatzen kafeteraren forma zehatza lortuko dugu. Kafearen katilua eta koilaratxoa, berdin.  Argiaren kolorea, kokapena eta indarra erabaki ondoren eszena izango dugu. Zein testura izango duen erabaki beharko da: testura gastatuak, berriak, zeramika, metala, zikinak ote dauden, hatz markak, erredurak...

Kolorearen teoria eta errefrakzioa landuko ditugu, argiaren isla eta argiaren itzal proiektatuak. Objektuen azalean argiak duen portaera. Aireak izan dezakeen dentsitatea ere landu dezakegu 3 botoi mugitu eta parametro matematikoekin jolasten; Dena, une oro, pantailan ikusita.

Marrazketa artistiko digitala amaitzeko, gidoiari lotutako animazioa egingo dugu. Adibide honetan hostoekin...Ikusteko animazioa klikatu azken irudi honetan.

MARRAZKI DIGITALA PLASTIKAN: TABLETAK

Gizarten Egipto lantzen ari dira eta, gonbidapena luzatu eta onartu ondoren, Plastikan Egiptoko irudiak landu ditugu. Egiptoko irudia aukeratu eta koloretan erreproduzitzea izan da helburua, koloretako arkatzekin. Baina irudimena lantzeko gaur egungo zerbait txertatu behar izan dugu marrazkian Egiptoko ezaugarriak galdu gabe, ahal bada.

Aurreko blog sarrera baten aipatu bezala, 1dbhko ikasle batzuek tabletak etxetik ekarri eta marrazkiak zein animazioak tabletetan egiten dituzte: hala nola, Gabrielle, Ilune, Nora, Juncal, Alaitz, Maider, Irati... Arkatzez eta tabletarekin prozedurak antzekoak dira. Tabletak koloreak hautatzeko edo zuzenketak egiteko erraztasuna emango dizu, baina trebezia izatea ere eskatuko dizu.

Hemen goian ikus ditzakezue Gabrielle eta Iluneren marrazkiak. Ikaragarri onak dira. Marrazki eta lan guztiak dira onak eta asko...ikaragarri onak. Nola egin duten ikusi nahi? Klikatu bi esteka hauetan eta ikusi: Jainko otsoa eta Egiptoko Simpson.

3D ANIMAZIOA. PERTSONAIA ETA EFEKTUAK MODU LIBREAN DESKARGATU ETA ERABILI.

 

Bideoa ikusketo klikatu irudia.

Gaur egun 3D diseinu eta animazioa egiteko Blender software librea daukagu. Software oso ona eta komunitateak indar handiarekin garatu eta zaintzen duena. Deskargatu eta erabiltzeko: https://www.blender.org/

Norberak landu ditzake 3D animazioaren atal guztiak softwaretik irten gabe: 2D eta 3D diseinua, marrazki teknikoa, simulazio fisikoak, partikulen sistemak, likidoak, sua eta kea, vfx efektu bereziak, bideo edizioa, 3D eskultura, 3D animazioa, konposizioa, argiztapena, testurak eta mila gauza geihago...

Baina horrek luze jo dezake. Horregatik, proiektu luzeak egiteko talde lanean aritzea eta indarrak metatzea komeni da. Baina, proiektu txikiak egiteko, eta nahiz eta bakarrik dena egiteko gai izan, interneteko webguneetatik jaitsi daitezke lizentzia librekoak diren besteek egindako hainbat fitxategi: 3D pertsonaiak, animazioak, objektuak, paisaiak, testurak,suak, keak eta antzeko efektuak, argiak eta abar luzea.

Bideoko leherketa efektuak, openVDBak. Libreak. https://jangafx.com/

3D pertsonaia deskargatu: https://free3d.com/ https://www.mixamo.com/

Bideo edizioa: https://www.openshot.org/ Diseinu bektoriala: https://inkscape.org/ Irudi diseinua: https://www.gimp.org/ 3D diseinu eta animazioa: https://www.blender.org/ 3D pertsonaia deskargatu: https://www.mixamo.com/

KULTUR ASTEA MAIATZEAN: ZINEMAGINTZA, MODA DISEINUA ETA ARGAZKIGINTZA

 

                                                                                        klikatu irudian bideoa ikusteko.

Plastika eta ikusizkoen hezkuntzan ikasleek ikasteko modu hoberena egitean datza. Egin eta ikasiko dut. Proiektu erara lan egiten dugu. Kontzeptu teorikoak hainbat prozedurekin aplikatuta. Formatuak eta teknikak ideia eta helburuetara egokitzen saiatzen gara: bideogintza, neurri handiak, espazioak eraldatu, espazioak erabili, taldeka, digitala ala lurrean margotzen...ezerk balio du balioko badu. 

Asko eta azkar ikasteko beste modua bizipenak eta esperientzia profesionalak edo beste eremuetan garatutako esperientziak ezagutzean datza. 

Aurten, hain zuzen, hori gauzatzeko parada izango dugu. 4dbhn dauden bi ikasleren ahizpak Plastika eremuko hainbat alorretan dabiltza: Irati Albizu (@iratiroal /instagram) moda diseinuan eta June Alduntzin (@xurne.s /instagram) argazkigintzan. Gure ikasleak izandakoak dira. Gure ikaslea izandakoa da  Ainhoa Gutierrez ere. Zinemagintzan dabil eta animatu da gurekin  kultur aste honetan parte hartzera.

Oso interesgarria izango da beraien esperientziak partekatu eta gauza berriak ikasteko aukera izatea; Nolabait ikasle, eta bereziki plastikako ikasle, izan eta beraien ibilbidean berriz Lauaizetara itzultzea.

Agendari buelta batzuk eman eta maiatzean egingo ditugu bisita hitzaldiak.

MARTXOAK 8 LAUAIZETAN. 2021.

 

ARGAZKIGINTZA. JUNE ALDUNTZIN.

 

Plastikan argazkigintza lantzen hasi gara eta konturatu gara telefono mugikorrarekin gaur egun zenbat argazki ateratzen ditugun, ia egunero. Mugikorrak geroz eta hobeagoak erosten ditugu: kamera onak ditugu poltsikoan, hara eta hona ibilita ere, beti eskura.

Askotan zaila da argazki ona definitzeko orduan hautatu beharreko irizpide sorta. Batzutan gauza bati erreparatuko diot eta bestean beste bati. Argia, esanahia, unea, kokapena, begirada, gaia...

Gure ikaslea izandako June Alduntzin argazkigintza munduan dabil jo eta su. Goiko irudian KLIKATU eta INSTAGRAMEKO bere kontura eramango zaitu. Beregana jo dugu galderak egitera eta bere lanen berri jarri nahi izan dugu hemen. Covidaren hau pasata, hurrengo ikasturtean edo, ea Lauaizetara ekartzen dugun hitzaldi-tailerra ematera.